محنة و منحة

و مش هحتاج عملية ..... و مش هحتاج عملية 

هييييييييييييييييييييييييييييييييييييييييه

محدش فاهم حاجة خالص طبعا 

و لا انا 

اصل البلد دي خلاص محدش فاهم فيها حاجة 

اييييييييييييييه . يلا . نرجع لموضوعنا 

علشان نفهم نرجع ليوم 31/7/2012

الموافق 12 رمضان 

.

.

.

.

.

.

.

.

.

.

.

.

.

.

.

.

.

في اليوم ده و بالظبط بعد أذان الظهر 

ايدي اتقطعت ببرطمان زجاج 

و نتج عن ذلك 

انه اتقطع في ايدي

عضلتين و عصب و شريان و وتر 

و في عصب كمان تضرر 

انا معرفتش كل ده طبعا غير بعد ما فقت من العملية 

كنت يومها بين الحياة و الموت . فقدت دمك كتير جدا 

و دخلت العمليات ساعتين و نصف الدكتور بيدور على اللي مقطوع علشان يخيطه 

المهم 

ايدي اتجبست 15 يوم و كانت بالمنظر ده 

و بعدين فكيت الجبس و حصل ما لم اكن اتوقعه ايدي مبتتحركش . صوابعي ثابنه على شكل الجبس و مش بعرف افتح ايدي و لا اقفلها . و ايدي صغيرة عن ايدي التانية و شكلها مش حلو و بتوجعني جدا

انا طبعا في الفترة دي كانت اعصابي تعبانة جدا . خاصة ان كتب كتابي كان بعدها باسبوع بالظبط .

و في كتب كتابي كانت مربوطة برباط ضاغط و كانت تعباني جدا

 المهم في الاسبوع ده كنت بعمل تمارين لايدي الدكتور قالي عليها 

و كان يا اما هعرف احرك ايدي يا اما مش هتتحرك تاني ابدا 

بعد اسبوع بدأت علاج طبيعي و إلى الأن ما زلت مستمرة

كانت صوابع الخنصر و البنصر مقفولين نص قفلة مش بيتفتحوا و عضلات ايدي بتصغر و بتضمر . مبقتش حتة بعرف افتح كبس النور  بايدي . مش بعرف افتح ايدي و اقفلها و مش بعرف اضم صوابعي لبعضها . يعتبر مفيش تحكم في ايدي . و الجزء اليمين من ايدي من  الخنصر و نصف البنصر لنصف رسغي مش بحس بيه 

بس في الفترة دي تعبت جدا . رحت لدكاترة كتير . كل دكتور بيقول حاجة 

دكتور مصمم ان العصب مقطوع قطع كلي و محتاجة عملية و دكاترة تانية بتقول لا العلاج الطبيعي هيجيب نتيجة .

و طبعا والدي تعبان معايا جدا . و تعبته انا كتير معايا بداية من الخضة و القلق عليا و على ايدي . مرورا بمصاريف العلاج و الدكاترة و الادوية . انتهاءا بحالتي النفسية و تعبي ليه علشان اروح للدكاترة و اخد العلاج لاني كنت وصلت لحالة اني زهقت خلاص و انا راضية بايدي كده و مش عايزاها تتحرك .

استقرينا في الاخرة على رأي 3 دكاترة ان احنا نكمل علاج طبيعي و نشوف هحتاج عملية و لا  لا و كملت .

 و بحمد الله اللي عرفت النهاردة من الجراح اللي عملي اول عملية . ان بما ان ايدي اتحسنت إن شاء الله مش هحتاج عملية .

الاحساس رجع يعتبر بشكل شبه كامل . و بقيت اعرف افرد صوابعي ما دام العضلة مش تعبانة . و بقيت اعرف اضم صوابعي لبعضها . فاضل بس العضلات بتاعة ايدي لسه ضمرانة. 

و ان شاء الله هترجع زي الاول بس هيتبقالي ندبة بعرض 7 سنتي تقريبا في ايدي تفكرني باني كنت في يوم هموت او هفقد ايدي و ربنا نجاني . 

المهم طلعت من الموضوع ده بحاجات كتير

عرفت اد ايه ربنا رحيم . اد ايه انا في نعمة .

عرفت ان ممكن عصب واحد من اعصاب كتيرة في جسمي يوقف ايد كاملة .

عرفت ان شريان واحد اتقطع كان هيتسبب في موتي. 

عرفت ازاي الدعاء بيخفف البلاء .

عرفت اد ايه في ناس بتحبني و بتخاف عليا .

عرفت اد ايه مامتي و باباي بيضحوا علشان و بيخافوا عليا  . و اد ايه انا كنت و مازلت تعباهم معايا .

طلعت بزوج ربنا يخليه ليا . و يرزقني رضاه عني . كان في امكانه انه يتراجع لما يعرف ان اللي اتقدم علشان يخطبها ايدها ممكن متتحركش تاني . و هياخدها بايد واحدة . صمم انه يكتب الكتاب . ووقف جنبي .

عرفت قيمة اصحابي وزاد حبي ليهم .

طلعت بكام بوكيه ورد حلوين 

و في الاخر خالص طلعت بان اتغير حاجات فيا كتيييييييييييييييييييييييير 

بحمد ربنا على كل نعمة في حياتي و باستغفره على كل نعمة انا مش بحمده عليها 

حمدا لك يارب . بحبك يارب