هلوسات قبل النوم

حاولت أنام كتير عمالة اتقلب على السرير لما  يقرب من ساعتين و مش عارفة أنام قلت أقرأ كتاب يمكن اعرف أنام

دورت في قائمة الكتب عندي عجبني أكتر من كتاب و في الآخر فتحت كتاب مختلف تماما ممكن لأني لسه منزلاه جديد و كاتب مش قرأتله قبل كده مأخدتش بالي حتة من اسم الكتاب

خلصت الكتاب تقريبا في اقل من ساعتين بدأته في 12:26 و خلصته على 2.22 هو الكتاب مش كبير قوي يعني مكملش 200 صفحة بس طلع  زيه زي كتب كتير مش عرفت اجمع منه حاجة مفيدة

الكتاب كان من النوع الساخر عمالة اقرأ من غير فايدة و في نص الكتاب لقتني بدأت عياط مع ان الكلام ملهوش دعوة بالعياط . بس مش عارفة ليه بعيط و ليه اقعدت اكمل قراءة و اعيط زيادة معاها .

ممكن لاني مش عيطت من فترة طويلة . وحشني العياط . مش عارفة إلى الآن كنت بعيط ليه

بس حسيتني استريحت بعدها مع اني مكنش في حاجة مضايقاني

طلعت بالكتاب كله بالجملتين دول اللي عجبوني

·         في الطفولة كان  معظمنا يحلم أن يصبح شخصا مهما عندما يكبر ، لذلك كانوا الأهالي يشترون لأطفالهم في العيد بدلة الضابط ، وحدي كنت أحلم أن أكبر لأصبح صحفيا لذلك كان أبي يشتري لي في العيد بدلة مسجون . 

·         أنت طفل لمرة واحدة في جياتك بعدها عليك أن تبحث عن أعذار جديدة

و موقف عجبني لما الكاتب قال انه بدأ يصلي و مامته مرة ضبطتته و هو بيصلي الفجر و قعدت تزغرد و هو ده بالظبط الجزء اللي بدأت  اعيط عنده

ممكن اكون عيط لاني تعبت من القراءة و دي كانت دموع القرح بإني أخيرا لقيت حاجة عجبتني يمكن

مش عارفة برضه

كل ده و لسه معرفتش ايه اسم الكتاب

بعد ما خلصت كل حاجة في الكتاب حتى إصدارات الكاتب و نقلت على الفهرس جه في دماغي سؤال مفاجئ هو اسم الكتاب ده ايه

بصيت فوق كده و تتوقعوا طلع اسمه ايه

جر ناعم للكاتب عمر طاهر

تعريف الكتاب في الآخر شدني بس لو كنت اعرف اللي هقرأه قبل ما اقرأه ما اعتقدش اني كنت هضيع فيه شوية الوقت دول

مش معنى ان الكتاب معجبنيش انه وحش جرب تقراه بس انا مش حبيته

اللي غاظني في الأخر ان برضه مجاليش نوم

لو حد فهم حاجة من اللي فوق ده كله يبقى يفهمني

 و يدعيلي ربنا يوفقني علشان امتحاناتي قربت

و بس

سلام