نزلت انتخب النهاردة و كنت فرحانة و انا واقفة في الطابور و بشارك لاول مرة في انتخابات الرئاسة . بس زعلت جدا من كلام الناس في الطابور بس ساكتة و مش بعلق . لجنتي كانت في منطقة شعبية و اهلها بسطاء جدا كل اللي داخلين يصوتوا بيصوتوا لاحمد شفيق و بينبهوا بعض قبل ما يدخلوا . عرفت ان حملات الفيس بوك اللي احنا بنعملها امسك فلول و يسقط الفلول و غيرها كتير مبتوصلش للناس الغلابة دي اللي بتمثل عدد كبير من شعب مصر , عرفت ان احنا مش هنستفيد حاجة بقعدتنا على الفيس عملين ننصح بعض و احنا عندنا الثقافة الكافية ان احنا نحدد احنا عايزيين مين و سايبين الناس البسيطة دي لسه عايشة في زمن اللي نعرفه احسن من اللي منعرفهوش . المفروض كنا نزلنا دقينا على الابواب و وعينا الناس و اعتقد انه حتى لو جه رئيس جديد كويس بس الشعب لسه معندوش وعي سياسي مش هنقدر نتقدم كتير . موقف تاني حصل قدامي واحدة منتقية كانت واقفة في الطابور و لقت ست كبيرة في السن متضايقة ان الظابط مرضيش يدخلها و الطابور طويل فوقفتها مكانها و رجعت هي في اخر الصف الناس بدل ما تشكرها او تحسن الظن بيها قعدوا يقولوا بيحجزوا للناس بتوعهم . وقفتها مكانها علشان تنتخب اللي هي عايزاه . امتى هنثق في بعض و نحب بعض و نحس الظن ببعض مش علشان انا لابسة خمار و انت لا بسة طرحة او انا متبرجة و انت منقبة ان احنا نكره بعض . برضه مش معنى اني هنتخب مرشح غير مرشحك انك تطلعي عليا إشاعة و تسئ الظن بيا . مع العلم بإن الآنسة دي مقلتش اصلا هي هتنتخب مين علشان تكون بترشيها بالمكان مثلا . اتضايقت برضه ان في ناس مثقة و على مستوى علمي عالي و مع ذلك لسه بنتخب الفلول و لما تقوللها و دم الشهداء تقولك ايه اللي نزلهم . لسه بنقول ايه اللي نزلهم حطي نفسك مكان والدة شهيد و حسي بحرقة قلبها عليه و انت عمرك ما هتصوتي لفلول . و مع ان في مواقف كتير زعلتني مقدرش انكر ان في مواقف تانية كتير فرحتني و خلتني احس ان لسه الامل موجود . ظابط الجيش واحدة ست كبيرة في السن بتسألوا رمز محمد سليمان ايه قالها يا حاجة مفيش حد بالاسم ده و بعدين قالي كلميها انتي علشان انا ممنوع اني اتكلم عجبني انه ملتزم بشغله رغم انه مكنش بياثر على صوتها او بيقولها تنتخب مين . و انا مروحة ركبت مكرباص مع ان الكمسري بان عليه تعليمه مش عالي قوي بس كان قاعد بيكلم راجل كبير في السن بيقولوا انتخبت يا حاج قاله لا مش هنزل . قاله انت معندكش شباب و احفاد زينا انزل علشانهم الربع ساعة اللي هتتضيعها من وقتك هتفرق معاهم في اربع سنين . علشان الشباب ده يشتغل و يعيش انزل انتخب علشان خطري انا . عجبني جدا تشجيعه ليه و فهمه للمسئولية و عجبني اكتر انه مقلهوش انتخب مين قاله انزل صوت للي انت عايزه بس شارك . المهم في الآخر اني دخلت و صوت للي انا عايزاه و طول ما انا ماشية للجنة عمالة ادعي ان ربنا يولي من يصلح و ان اختياري للمرشح ده من اجتهادي و اقتناعي بانه الافضل يارب لو كان اختياري صح فجازني و وله و ان كان اختياري خاطئ فاغفرلي جهلي و ولي من يصلح
رحمة لبن تتحدث ^_^
للاسف الروح المنتشره دلوقتى اساءه الظن والكذب والكره والغل الا ما رحم ربى بس الواحد بيحاول يتفائل بالخير عشان نجده ان شاء الله
ردحذفأزال المؤلف هذا التعليق.
ردحذف